波波貓係我在灣仔準備去阿嫂的生日PARTY前，駕住車突然有一班人截停我地，仲以為係咩樹！？原來有隻BB貓企左係路中心唔郁，果班人驚車親佢於是截停我地，然後將BB貓放係路邊。於是我同爸爸(即是我老公，我叫佢做爸爸，佢叫我媽媽)落車睇下，一見鐘情於是老笠左佢返屋企。爸爸仲同阿嫂講話送份生日禮物比佢，然後係個袋度拎BB貓出來，搞到阿嫂好鬼開心，但係我唔捨得所以只好收返，拎左返屋企養。
起初諗唔到改咩名，所以一直叫佢貓貓。但係可能叫得多，佢學左我地咁講野，佢既叫聲係「貓貓、貓貓」咁叫，我地都覺得好神奇！當左佢係寶！我亦都第一次見有男人會日日夜夜都攬住隻貓周屋走，去到邊都攬住佢。 
佢愈大愈圓，縮埋好似個波咁，我地先叫佢做波波貓。佢大個仔，日日要嘈出街，都成日係咁貓貓、貓貓咁叫，於是我試過錄低佢，下次搵到個FILE比大家聽下。
因為住村屋既關係，所以開隻窗佢都走左出去玩，但係佢自己識得天黑前係個窗度返屋企。有時佢出去時，會回頭CHECK下我地會唔會閂窗，一伸隻手去作閂窗狀佢就會抓我地同埋鬧幾句，姐係叫你唔好閂窗如果唔係佢無門口入。
有時佢都有試過幾日無返來，但係最後都會返屋企。但係有一日佢出左去之後，等下一個月、又一個月，出埋尋貓啟事都搵唔到佢，以後都無再返過來。
